ගාල්ල දිස්ත්‍රික්කයට අයත් වර්ග කිලෝ මීටර් 40.75 ක භූමි ප්‍රමාණයෙන් යුත් මෙම ප්‍රාදේශීය සභා බල ප්‍රදේශය උතුරු හා ඊසාන දෙසින් බද්දේගම ප්‍රාදේශීය සභා බල ප්‍රදේශය ද, නැගෙනහිර හා ගිණිකොන දෙසින් අක්මිමණ ප්‍රාදේශීය සභා බල ප්‍රදේශයෙන් ද බස්නාහිර දෙසින් රජ්ගම ප්‍රාදේශීය සභා බල ප්‍රදේශයෙන් ද දකුණු දෙසින් ගාල්ල මහ නගර සභා බල ප්‍රදේශයෙන්ද මායිම් වේ.

මෙම ප්‍රාදේශීය සභා බල ප්‍රදේශය ග්‍රාම නිලධාරී වසම් 51 කින් සමන්විත වන අතර, ග්‍රාම නිලධාරි වසම් 44 ක් බෝපෙ පෝද්දල ප්‍රාදේශීය ලේකම් බල ප්‍රදේශයටද ග්‍රාම නිලධාරී වසම් 07ක් ගාල්ල කඩවත් සතර ප්‍රාදේශීය ලේකම් බල ප්‍රදේශයටද අයත් වේ.

පළාත් පාලන ආයතනයක් ලෙස අපගේ පූර්ණ වගකීම වනුයේ “පොහොසත් රටක් ලස්සන ජීවිතයක්” තේමාව පෙරදැරිව බෝපෙ පෝද්දල ජනතාවගේ සුඛ විහරණය සහ සුභ සාධනය යන සියලු පහසුකම් ආරක්ෂා කිරීම සහ වර්ධනය කිරීමට අදාළ සියලු කරුණු විධිමත් කිරීම සහ පාලනය කිරීමයි. මෙම කරුණු ක්‍රියාවට නැංවීමේදී සිවිල් සමාජය, පුරවැසියන් හා පළාත් පාලන ආයතන අතර සබැදියාවක් නිර්මාණය වීම නිරන්තරයෙන් සිදු වන අතර මෙම සබැඳියාවන් වඩාත් ගුණවත් බවින් හා කාර්යක්ෂමතාවයෙන් යුක්තව වර්ධනය කිරීමට අවශ්‍ය සෞඛ්‍ය හා සනීපාරක්ෂාව , යටිතල පහසුකම් , සමාජ සුභ සාධනය හා ආර්ථිකය නංවා ලීමට අවශ්‍ය කටයුතු ක්‍රියාත්මක කිරීම මාගේ හා උප සභාපතිතමා ඇතුළුව සහෝදර මන්ත්‍රී මණ්ඩලයේ වගකීම හා යුතුකම බව මා අදහස් කරන්නෙමි.

ඒ.එල්. ලලනි ජයමිණී

බෝපෙ පෝද්දල ප්‍රාදේශීය සභා බල ප්‍රදේශය තුල විහිදී සිටින 69,868 ක් වන සියලු ජන කොට්ඨාශවල පොදු අවශ්‍යතා සපුරා ලීමට එම ජනතාව වෙතින් රැස් කරනු ලබන බදු, ගාස්තු හා වෙනත් සියලු ආකාර වලින් සභා අරමුදලට ඒකරාශී වන සියලු මුදල් මනා කළමනාකාරණයකින් හා පරිපාලනයකින් යුතුව යොදවා ඔවුන්ගේම සුභසිද්ධිය සලසා දීම අපගේ ඒකායන පැතුමයි

පී.කේ. ලලිත් ගාමිණී